米奇樂園?!

琴日番到公司, 去到放大假位同事個位幫佢睇E-貓時, 見到佢屏風上面嘅米磁石裝飾俾米奇食咗個平頂, 嚇到死死吓!  今朝番到公司仲勁~ 米奇連膠水樽都唔放過! 咬到個底穿晒, 駛唔駛咁口渴呀?

再睇多幾睇, 嘩! 不得了!  衰米奇仲邊行邊痾tim! 枱面、PO、Scanner、文件都無一倖免, 全部中招, 好彩今朝清潔阿姨有嚟到, 有佢幫我哋收拾殘局咋, 如果唔係都唔知掂唔掂佢好呀!

跟住清潔阿姨仲見到地主個發糕又俾米奇攞咗出嚟食, 上面菩薩兩個蘋果又俾佢咬咗幾啖, 哼! 你都算為食喇, 神枱食物都敢食, 乜你唔怕肚痛咩?

到咗下晝另一同事見到天花板上面有個窿窿, 係俾冷氣機水整濕咗再俾米奇咬穿架!!!  最驚就係個窿就喺正我頭頂過少少, 容乜易做做下嘢米奇跳落嚟我同say hello架???  好彩老板娘lunch後唔知喺邊度搵咗塊假天花番嚟叫阿叔換咗佢, 咁都冇咁驚~

唔知聽朝番去, 仲會唔會睇到米奇嘅新搞作呢? 唔該你唔好再出嚟嚇我哋啦~

天花板上面個窿, 足足夠米奇自出自入...