Bubble仔上星期五做完desex之後, 今日已經係第四日, 檢查過佢傷口冇發炎又冇腫, 今日終於可以放監喇! 
一拆低個頭罩, Bubble仔就lam身lam勢, lam足15分鐘先走去食菜菜, 最抵死就係如果你走去摸吓佢, 佢就好似嫌你污糟咁, 將你摸過嘅地方又lam多次, 好搞笑~ 
放咗監真係唔同d, 食菜食得快d, 心情靚d, 連d屎屎都大粒d! 
好喇, 兔爸終於唔駛做屎撈人, 我亦都唔駛做阿四lu~ 
但係Bubble仔d止痛藥同抗生素未食完wor, 唔知要食到幾時呢? 駛唔駛食晒0架???
仲有十幾個鐘, 就到 Bubble仔同 Dr. Betty嘅約會時間! 冇錯, 就係我未得Bubble仔同意, 就幫佢約咗 Dr. Betty...... 同佢做desex~
可憐Bubble仔到 lee一刻都未知聽日有大事來臨, 不過大家千祈唔好話佢知呀, 我驚佢唔肯跟我出街呀! 
事源前幾日朦豬媽同朦豬睇完Dr. Betty, 佢要磨牙仔呀~ 番嚟話唔錯, 價錢都OK, 咁我咪又打去問下做desex幾錢lor, 一問之下, 原來平大圍成一大截, 心諗收費咁抵應該要排好耐隊啦, 所以即時同護士姐姐講想約埋日子, 點知又唔係wor, 星期二問最快星期五就有時間喇, 橫掂我一直都心思思想早d幫Bubble仔約做desex, 所以就喺3分鐘內落咗booking, 約咗聽日10:30am, 等佢settle down之後就去番工, 然後放工再去接番寶貝仔番屋企。
雖然我知要做麻醉, 但係一d都唔擔心, 諗到仔仔做完desex可以有機會長命d同健康d又乖d, 反而開心tim呀! 
Bubble仔, 你聽日要乖仔呀, 你叻叻媽咪就錫晒你! 
不過記住唔好好似朦豬哥哥咁咬Dr. Betty咁曳曳呀, 如果唔係俾人拆埋你d牙仔媽咪都救唔到你架! 知道嗎?
今日因工作同事頭婆嘈咗兩句, 頭先番到屋企好同事通水話事頭婆同佢講聽日要同我"單獨"開會。 唔開心, 因為佢話我做野態度有問題?! 我唔否認可能我未夠經驗, 所做嘅行動可能唔係咁0岩佢心意, 但係我唔可以接受佢話我工作態度有問題!!!
我有問題? 邊夠你偏幫d番工唔做野, 11點幾就出去話上客公司, 但係又唔知死咗去邊嘅庸員咁有問題??? 你老公都話要炒佢, 你就去保佢保到同老公嘈到拆天, 唔駛掛? 咁對其他有做嘢嘅staff公平咩? 好喇, 我知世界上冇公平, 但係都要我服架嘛!
好喇, 聽日睇下你講咩, 如果你只係用詞不當(工作態度有問題), 我可以算數, but如果你真係咁覺得, 咁唔該你另請高明, 我唔識幫你做野嘞!! 
上星期日見得閒, 試吓同兔爸夾手夾腳自己同Bubble仔梳毛毛, 平時只係梳到背脊, 肚腩仔多數都係留番帶佢去兔協剪甲甲時等姐姐幫佢梳下, 因為小王子都幾惡死, 絕對唔係兔咁品0架!!! 
我同兔爸前後左右夾攻, 只係用咗15分鐘就將Bubble仔反轉再反轉, 梳得靚仔到不得了! 個衰仔一梳完就好似放監咁飛奔番入個籠度, 用佢個又圓又大嘅八月十五對住我哋! 俾零食... 唔要! 菜菜呢... 唔要! 玩具呢... 唔要! 咁蘋果乾呢... 竟然都唔要!!! 最後我哋投晒降, 將"貢品"放喺小王子個糧兜入面, 關門走人也...... 
點知我哋一行轉背, 小王子即刻開懷大嚼, 食得唔知幾開心?! 仲跳來跳去tim! 仔呀仔, 保你大喇, 你唔好玩媽咪得唔得呀? 
人物介紹 -- 首席法官: 兔媽小琪 / 檢察官: 兔爸Grey / 犯兔: Bubble
開庭!!! 威 ~ 武 ~
法官: Bubble疑於二OO七年十月二十八日, 於家中散步時連番瀨尿, 你認唔認罪? 
犯兔: 冇呀, 邊度有wor, 水嚟之嘛...... 
檢察官: 仲講大話? 明明係尿尿嚟架!!! (兔爸清理的!)
法官: 你仲有冇得狡辯? 
犯兔: 兔哋知錯喇, 俾次機會啦~ 
法官: 本席就罰你錫番爸爸媽媽每人一啖啦~
退庭!!! 威 ~ 武 ~
好嘢! 之前寫唔到BLOG嘅問題已經解決, 要多謝YY老師及小草, 係睇過佢哋個BLOG, 見有一項有人提到".......裝 IE 7......", 心諗: 橫掂都寫唔到, 咩辦法都試下啦~ 點知一裝好, 試多次先! 得咗!!! YEAH~ 好開心呀, 各位, 我同BUBBLE仔又番嚟喇~ 
但係, 之前我留咗言俾Y! BLOG小編輯, 又SEND過E-MAIL俾Y! BLOG Support Team, 但到依家我自己搞掂咗個問題都未有人回覆我lor, 超失望呀......唔該檢討吓啦!!! 如果唔係唔捨得D BLOG友同兔友, 我一早搬咗BLOG喇...... 
由細到大都好鍾意扭蛋, 年頭到依家都買咗d架撐(各式膠盒及熱熔槍), 諗住放好我d寶貝, 今日終於心血來潮一口氣整咗個上集, 睇住先啦, 希望聽日有時間繼續整埋下集~
最鍾意lee套, 一套十款, 仲欠3款 (3, 4, 8號), 但我就double咗(1,5,9,10號), 如果有Blog友屋企有double嘅話, 歡迎交換!
)
