經過同間房搏鬥咗足足2日, 由書枱執到床下底, 再執到大書架, 再進攻埋鞋櫃, 終於叫做執好我自己d野, 準備過新年喇~ 
除咗執房之外, 仲同屋企人去咗沙田市中心間西田買嘢, 先去Levis, 細佬買咗件夾棉褸, 折實千幾蚊, 雖然有d貴, 不過好好睇, 我就買咗條牛記, 折實$599, 正!!!
再去寢室用品部, 我同細佬每人買咗一張50%羽絨被(原價$1289, 特價$299), 每人一set床笠+被袋+冷氣被(原價$599, 特價399), 但由於大人pattern冇single bed size, 所以最後細佬要咗反斗車王, 我要Chip n' Dale, 我哋仲笑自己2個人加埋成50幾歲人, 仲買小朋友床單添~ 
一家四口行完街街搭的士番屋企, 多嘢到差d上唔晒車添呀~ 
仲有兩日咋, 好期待新年來臨可以收利是, 仲有初五就同兔爹去泰國玩喇~ 番嚟至同大家報導啦~
琪琪同Bubble仔預祝大家心想事成萬事勝意出入平安龍馬精神, 兔兔們聽教聽話身體健康! 
上星期六見數數吓就快到新年, 即刻打電話叫埋兔爹一齊去剪頭髮。 去到salon雖然人山人海, 不過都唔敢行住街等, 因太多人喇, 行開咗都唔記得你排緊隊, 唯有乖乖哋坐定定等下啦~ 
等咗個半鐘終於到我洗頭, 洗完頭再等多3個字就開始染髮...... 過咗好耐, 染好髮再等咗勁耐就開始剪頭髮, 今次又剪薄咗好多, Tommy幫我剪咗好多layers, 剪剪吓見到兔爹就快訓著, 就叫佢自己去我個袋度攞NDS玩..... 見個洗頭姐姐仔搵咗10分鐘都搵唔到, 我即刻叫Tommy停手唔好剪住, 我自己行埋去搵, 唔係掛?! 真係冇? 我個人都未走, 我個袋點會走先架?!!!!!! 
問晒咁多個junior staff都冇人認係自己放個錯個袋俾其他客, 都預咗冇人肯認... 不過應該係放袋嘅人求其, 接袋個人白痴lor~ 佢自己個袋就冇攞到, 留咗喺salon, 第一, 顏色唔同, 第二, size唔同, 應該話差好遠, 第三, 重量都唔同, 根本冇可能攞錯咗5個鐘都唔知!!! 
等到夜晚9點幾, 越諗越唔放心, 去警署報失先, 再打去card centre freeze晒所有提款/信用咭, 點知我一搞好以上手續, 一折返salon, Tommy就話俾我知條白痴仔剛打電話嚟, 話發現自己攞錯袋, 即刻攞番落嚟...... 真係唔試過都唔信有人會咁朦!!!
佢嚟到俾番個袋我, 我怒氣未平係咁易串咗佢兩句, 佢仲傻吓傻吓咁樣, 真係想一拳打埋去, 仲搞到我freeze晒d咭, 成個weekend都冇錢用, 好彩有兔爹俾住先咋! 
以後去剪頭髮點唔方便都會攬住個袋, 以防萬一! 
