2008年1月19日 星期六
一肚火Dinner
辛苦完整個星期, 諗住同Bubble爸食餐好d, Bubble爸提議去沙田市中心連城廣場嘅Strawberry Forever試下, 因為上次我皇媽指定要去隔離間表哥食, Bubble爸見到人哋個menu有大大碗熱辣石頭鍋飯流晒口水, 今次我哋兩口子撐枱腳就去試下啦!
開頭大家都開開心心點餐冇咩問題, 個忌廉湯唔夠熱, 冇咩味, 算啦, 好多餐廳都係咁, 到Bubble爸個飯上枱先嚇親! 同個menu張相簡直係兩回事, 等番1/4份量(both個煲同飯餸)!!! 所謂嘅石頭鍋飯就係用個凍嘅淺底黑色細煲仔喺電飯煲攞d飯放入去, 再放幾塊現成kimchi, 幾塊爛鬼豬軟骨最後淋D kimchi水+所謂肉汁上面做汁, 一食落口Bubble爸爭d噴飯, 我見佢咁誇我都即試咗啖, 嚇死咗, 唔再掂佢碗野, 乖乖等我個意粉好過~ 
到我個青芥末煎鴨胸意粉上場喇, 一入口就食得出青芥末汁溝咗好多水, 全碟得3塊"刀工精美" -- 好薄而唔覺有被煎感覺嘅鴨胸, 再加上茶餐廳都不如嘅發水cheap意粉! 頂頂頂!!! 我自己整好食過佢10000倍, 俾咗錢免為其難食晒d冇味鴨胸同蔬菜, d人埋嚟收走碟冇收我碟意粉, 我叫佢收埋佢, 佢竟反問我: 小姐, 你都未食完? 我答: 收啦! 好難食呀!!! 佢若無其事咁收走碟意粉, 我叫佢上埋餐茶同cake啦(每個套餐加$20有"半件cake", 點解我咁強調係"半件cake"? 因為對佢本身而言算係一件, 但你同是但一間同樣收$20一件嘅coffee shop比完全係少咗一半lor! 勁呃錢!!! 
個餐茶先搞笑, Bubble爸叫咗杯凍檸檬茶, 我叫熱檸檬茶, Bubble爸一飲入口又叫我試, 哈哈! 勁呀! 好一杯有冰但又唔凍, 有檸檬但冇檸檬味, 有茶色但又冇茶味嘅凍檸檬茶! 等咗10mins都未見我杯熱檸檬茶, 催佢先施施然沖俾我, 仲要係唔熱, 同樣係有檸檬但冇檸檬味, 有茶色但又冇茶味嘅熱檸檬茶! 但最神奇都可算係唔知點解會有唔應該出現嘅咖啡味lor! 我同佢投訴杯檸檬茶咖啡味仲重過檸檬味, 佢夠膽死只好行咁講咗句: 係呀, 唔好意思wor~ 頂! 嬲到我叫Bubble爸一毫子tips都唔好俾!
同場加映隔離枱斯文OL小姐同男友食飯, 叫咩冇咩, 叫士多啤梨紅豆甜品就有士多啤梨冇紅豆, 叫芒果甜品又唔知冇咩, 總之連問幾樣都係冇嘅! 另一枱就換咗幾杯奶茶都係咖啡味, 勁離譜!!! 
大家請記住LEE間鋪, 冇野食都唔好去幫襯呀!
2008年1月14日 星期一
唔係掛! 又歪咗?!
好耐冇寫BLOG喇, 皆因前2個月又忙, 身體又唔好, 有時間都只想訓覺, 所以冇寫到lor, 依家終於好番d, 帶埋Bubble仔番嚟同大家傾餐飽。 
首先報導吓我個寶貝仔嘅近況先啦, 其實我都少咗見佢, 感冒嘛, 費事搞個人兔交叉感染就唔係咁好啦~ 
前排好凍嗰幾日, 我買咗一張毛毛床俾兔爸帶番屋企, 個外框俾狗狗訓, 中間個毛毛cushion就俾咗Bubble仔, 根據兔爸引述, Bubble仔每日都要殺死毛毛cushion幾次先會肯安心坐上去休息, 到今時今日成個幾星期都仲係咁, 笑爆嘴 ! 
到我自己喇, 唉~ lee排唔知做乜, 日日面青青, 又訓唔到又易暈, 終於頂唔住又去上水搵下肥仔醫生。 上星期六夜晚7點去到, 等咗大半個鐘終於到我, 原來又係條頸椎又歪咗, 冇錯, 係"又"歪咗! 唔止我, 其實好多人都會係咁, 點醫? 先玩拔火罐, 好彩今次只得一個, 再嚟lock頸lock身, 砌番副lego終於鬆番晒, lee兩晚終於有覺好訓~ 
今日無端端俾老板娘捉住OT到8點幾, 仲話聽晚同後晚都要全人類OT到9點, 你冇事呀嘛, 連O幾日, 唔駛休息咩?
訂閱：
文章 (Atom)