剝牙記~

上次喺大圍試咗間$200洗牙, 個牙醫好似想拆咗我棚牙咁, 條喉又伸到入喉嚨, 好鬼死粗魯架! 佢之前幫我check過話我有隻智慧齒蛀咗少少, 最好剝咗佢, 本來約埋時間聽日去剝架喇, 不過反覆思量後都係番屯門個牙醫再check多次穩陣d, 我以前住屯門時都係睇lee個牙醫, 不過數數下, 都有成十年冇幫襯佢lu~

今日終於番咗屯門再check多次牙, 隻智慧齒真係蛀咗, 牙醫都唔建議補番, 因為: 1) 隻牙太入, 補番都會好易番蛀; 2) 我只生咗上面兩隻智慧齒, 下面一隻都冇, 而牙齒係一上一下組成一對先可以磨到食物, 所以基本上lee兩隻智慧齒可以算係冇用, 唔要都得. 既然牙醫叔叔都咁講, 就聽佢話剝咗佢啦~

剝牙之前我都勁問佢痛唔痛, 佢同十年前一樣咁答我, 唔痛就呃你, 不過一定唔會好痛. 好! 就信你啦~ 佢叫我合埋眼, 唔駛理佢做d咩, 佢首先幫我打咗麻醉針, 我feel到應該係3支, 第1、2支唔痛, 第3支先有少少痛, 幾秒後就唔痛lu, 跟住佢就好似裝修佬咁喺我個口入面撬來撬去, 撬咗兩分鐘就已經拆咗我隻智慧齒出嚟, 抵我咁遠水路入番去幫襯佢, 完全冇痛, 5點幾剝完到依家咁多個鐘, 麻醉藥過晒都冇dd痛, 超好手勢呀!

但係佢就話俾我知其實兩隻智慧齒都生得好長, 最好遲D剝埋另一隻, 費事佢阻住我刷牙, 反而會蛀咗前面隻牙喎~ 既然冇用, 咁就下個月去剝埋佢啦~ 佢仲幫我袋埋隻牙俾我帶番屋企留念tim~

等依家個傷口好番, 食野冇問題就可以約時間去剝埋另一隻喇, $700剝一隻智慧齒 (包埋藥, X光, 麻醉針), 又咁正唔痛, 抵到爛啦~