Gladys 一天一點一滴小故事: 2008

2008年12月28日星期日

求日子倒數器

各位blog友都知道小妹2009年尾出嫁啦, 好想可以喺blog度放個靚靚日子倒數器, 有冇人知道邊度有得download呢?

另外, 我想搵可以做以下糖果嘅 Table Gift Co. / Candy Co., 如有資料請提供, Thanks!

2008年12月26日星期五

影咗結婚相喇~

12月11日係我哋影結婚相嘅大日子, 行程如下:-

上午6點起身出門口, 搭火車去尖沙咀食早餐, 8點鐘去到影樓。由於影樓新studio漏水, 所以唔駛加錢轉晒外景俾我哋影, 仲送埋造型師免費跟足全程tim~

8點化妝到10點, 休息一陣同台灣攝影師 - 順子哥哥傾吓點影法, 由於小灰嘅"煲冬瓜"只屬BB班程度, 所以完全唔知我哋傾D咩~

10點30分上車, 先去頭站麗都灣, 即青馬大橋下面, 效果非常好~

第二站石澳, 我哋要爬入石灘中間取景, 之後連人帶婚紗跳落水再影, 小灰俾石頭界傷咗隻腳, 係辛苦D不過效果都唔錯!

第三站赤柱, 嘩~ 勁囉! 由於我係著紅色晚裝, 有少少"馬來西亞沙龍"feel, 小灰就著便服, 一企上樓梯開始影, 我發現起碼有12部相機對住我係咁影, 當中包括小情侶同埋旅行團, 仲要跟足全程, OH MY GOD! 從未試過咁多部相機對住我, 唔該如果有人當日影到我哋, 唔該send番d相俾我留念吖唔該~

第四站仲誇張, 中環! 大家都知道放工時間嘅中環有幾多人架啦, 我要著住件吊帶晚裝過馬路, 仲要著住3吋高踭鞋爬上馬路石壆上面, 後面有幾十架巴士行緊, 一企唔穩就係咁先架喇, 不過影出嚟真係超正lor! 最後影中環棵超高聖誕樹, 又係一企埋去就好多部相機對住我, 都係嗰句, 如果有人當日影到我哋, 唔該send番d相俾我留念吖唔該~

6:30pm大功告成, 打道回影樓落妝番屋企lu~

感謝主賜俾我哋咁好嘅天氣, 令我哋可以影到咁靚嘅結婚相~

明年我要嫁給你啦~

婚前最後一個平安夜及聖誕節'08

今年係我同小灰婚前最後一個平安夜及聖誕節, 喺平安夜晚上, 我哋去咗聖堂派朱古力俾望完彌撒嘅教友, 之後我哋就同其他工作人員一齊排排坐, 等子夜彌撒, 其實10:30pm開始已經有好多人入去教堂入面, 等00:00嘅子夜彌撒, 到真正開始時, 完全係企到出門口! 到01:20am, 望完彌撒後已經睡魔急call, 番歸訓覺去也。

第二日聖誕節喇~ 我哋訓到日上三竿, 中午先爬起身, 再番聖本篤堂集合, 今次係同其他教友一齊去威爾斯報佳音呢~ D病人見到我哋都好開心, 有D仲同我哋一齊唱歌拍手tim! 希望大家都可以早日康復出院啦~

2008年12月25日星期四

唔覺意收咗2份聖誕禮物~

今日Daddy & Mommy拍拖去咗Tough嘅outlet掃貨, 買咗一大袋衫番嚟, 食完飯就開始玩fashion show喇~

Mommy攞咗條牛記俾我, 叫我試吓, 仲話"條褲我買俾自己架, 靚嗎?" 咁叫我試做咩??

點知試咗出嚟, 我仲0岩身過佢, 最後俾咗我著喇~ 哈哈, 多謝晒!

到Daddy"晒"衫喇: 阿女, 呢條牛記幾清呀呵?

Me: Daddy, lee條係女裝低腰褲wor...

Daddy: 咁你試嚟睇吓... (著出嚟後) 你又著得幾好睇wor, 俾咗你啦~ 呀, 試埋lee條啦不如~

Me: lee條係男裝wor, 我著唔好睇架wor... (不過都係試咗, 仲要0岩身tim!)

Daddy: (吹漲中)... 咁你要埋lee條啦~

Me: 唔啦, lee條你著好睇D~

就係咁, 我就唔覺意收咗2份聖誕禮物, Thanks Dad, I love you!

2008年12月17日星期三

Big Meal

菜肉雲吞豬扒麵x1酸辣湯x1鍋貼x1炸小鏝頭x3奶黃飽x1豆漿x2

以上就係我同小灰今晚嘅晚餐, 好味道呀~

2008年11月9日星期日

Back to Jesus

琴日應邀跟咗華哥番元朗錦光, 自從12歲領堅振之後都冇乜步入過教堂, 咁多年嚟好想再番去, 不過每次都遇唔到有人上慕道班, 結果都係番唔到去......

雖然我自已係天主教徒, 不過咁多年間都有跟朋友去過3次基督教聚會, 但每次都唔係好開心, 嗰d人知道你係天主教徒, 一係就同你劃清界綫唔理你, 一係就想同你洗腦, 令你覺得佢哋嘅一套先係耶穌嘅道理..... 我就唔係好buy lee d態度lor~

琴日入到錦光, 雖然除咗華哥之外冇個識, 但係好有親切感, 完全感覺到自己又番咗主嘅身邊, 感覺好似身邊成班人好似一早識嘅咁。

可能你會問, 點解冇番咁耐, 冇端端做咩搵教會番呢? 因為我人生各方面完全get lost晒, 唔止冇晒方向, 心情/健康/脾氣/思維完全亂晒龍, 喺我前排最無助嘅時侯, 華哥就問我有冇興趣去佢哋嘅聚會, 咁就去咗一次lor~ 我覺得係主嘅安排...

下星期我約咗灰生一齊去, 去多兩次如果覺得OK, 我諗我會stay喺錦光。

又有歌聽喇~ OT幾夜都唔怕喇~

部 ipod shuffle壞咗咁耐, 今日灰生終於買過部nano俾我, 真係等到頸都長埋呀陰公~

黑色架, 睇吓佢幾靚仔! 多謝老公仔~

2008年11月8日星期六

You are my all in all

You Are My All In All

You are my strength when I am weak
You are the treasure that I seek

You are my all in all
Seeking You as a precious jewel
Lord, to give up, I'd be a fool
You are my all in all
Jesus, Lamb of God, worthy is Your Name
Jesus, Lamb of God, worthy is Your Name
Taking my sin, my cross, my shame
Rising again I bless Your name
You are my all in all
When I fall down, you pick me up
When I am dry, you fill my cup
You are my all in all

http://www.youtube.com/watch?v=zC617kE1maU

2008年11月7日星期五

回想從前......

唔知點解雖然番工番到好攰, 但係點都訓唔著...

諗住上嚟打吓BLOG, 但係坐咗好耐都唔知寫咩好...

突然間諗番起好多前塵舊事...

仲記得十年前, 有個人陪我慶祝生日, 佢成全咗我嘅心願, 喺山頂過生日。多謝您!

曾經番工每日都好唔開心, 但係佢竟然可以成為唯一一個令我快樂嘅人。多謝您!

你教我學懂施比受更有福, 亦令我知道自己有幾幸福。多謝您!

相處期間生活雖然平淡, 但快樂; 毫無刺激, 但溫馨。

同你相處令我感受到心中富有嘅重要性。

雖然相處過程中, 大家都受過傷......

隨著時間流逝, 我同你都有不同嘅際遇...

喺今日, 我好希望可以同你重新認識, 重新做朋友...

可以嗎?

(這篇BLOG對象只有一個人, 除此人外, 請勿留言, 否則一律刪除, 敬希原諒!)

2008年11月6日星期四

好嬲呀~~~

點解世界上會有D咁不負責任, 不知羞恥, 不知所謂嘅人??????????! 仲要偏偏係我同事?!

2008年11月4日星期二

好開心!

好開心呀~ 前幾日俾個失散10年嘅朋友喺facebook"執番"我, 原來唔經唔覺已經過咗咁多年, 佢仲結咗婚有個好得意嘅囡囡tim呀! 真係好cutie架~

TO: KEI,

祝你幸福快樂 ~

FM:KAY

2008年11月3日星期一

Thank you Sir!

自從上星期開始, 好期待今日嘅訓練班, 今次係由韓國國技院一級教授飛嚟香港指導我哋, 學費位位HK$300, 但係真係值得!!!!!!

教授有個居港多年但仲係半咸淡廣東話嘅翻譯, 我寧願佢講英文我會明多D lor~

不過3個阿sir都好nice, 又好心機教我哋班二打六, 話晒都係人哋國技wor, 見到我哋操到鬼五馬六都冇發火, 果然係大師級人馬, 好嘢!!!!!!!!!!

不過到最後都係唔夠時間, 操唔到我最想學嘅金剛, 真係非常遺憾......

希望下次再有機會上佢哋嘅堂啦, 話時話, 我畢業之後都冇試過好似今日咁專心上堂wor, hahahaaa...

爺爺生日快樂~

上星期六爺爺生日, 同阿蛇請咗半個鐘早走, 教完大半堂拳走先, 梗係啦, 要由屯門去西環食飯呀, 唔9秒9點準時到wor~ 落街即刻狂奔去車站, 吹到d頭髮飛起晒, 仲好, jel都慳番!

先搭巴士去旺角, 一場出到嚟一定要買番杯我至愛嘅新鮮檸汁飲吓啦!!! Yummy~

買完就搭小巴落西環喇, 順利到達, 全程只需1個鐘, 勁呀!!!

上週回顧

上上個星期六好開心呀!! 老友Carmen生日, 佢例牌叫晒班friend落pub飲野, 當然唔少得佢老公仔Simon啦~ Party 10點開始, 都不外乎飲酒 + 骰盅 + 猜梅 + Smoking 啦~ 不過我 lee d唔食煙嘅異族人, 唯有成晚行出去走廊呼吸新鮮空氣, 同埋勁俾人隊酒呀~

玩吓傾吓到差唔多1點, 本來想同Mary姐一齊走人, 點知俾0岩0岩放工趕到嘅Tommy截住走唔甩, 唯有乖乖哋坐低繼續飲啦~

飲到3點左右, 又走咗一批人, Agnus話等多陣送埋我走wor, 好啦, 橫掂大家都住大圍, 就等埋先啦, 一等等到4點半, 佢朋友車到我哋番屋企門口, 入到屋沖完涼9秒9飛撲落床大覺訓lu~

P.S. 下次唔去LEE度得唔得呀? 成晚都係飲Black Label + 綠茶, 仲要好似飲咗成晚蜂蜜綠茶咁lor, 咁淡, 我沖俾你哋飲都得啦~

2008年10月20日星期一

生日節目

上週六係小妹生日, 食生日飯都食到冇時間寫BLOG, 依家寫番夠本補番數至得!

起身如常先入馬鞍山教小朋友跆拳, 到11點落堂後就出咗去尖沙咀, 行咗一陣街去無印掃咗少量貨, 等到媽咪放工一齊去翠華食個靚LUNCH, 牛油豬仔包, 超正!

食完之後去青樺試嚟緊12月影婚紗相嘅禮服, 不過要FINAL FITTING先影得相, 遲D先POST俾大家睇啦~ 我一共揀咗4套, 灰生2套, 佢D衫都OK, 但係褲就試幾條先試得0岩, 佢賴我成日俾多2/3份餐佢食, 搞到我瘦身, 佢增肥wor~

本來想嚟件Deep V影吓相, 一生人點都要晒一次, 點知媽咪唔俾, 試著都唔得...... (細細聲講你知吖, 本來冇預佢架, 點知佢一口話要嚟, 唔通唔俾咩? 咁咪出事lor!) 不過最後好彩有老友Donna同青樺老板娘~Tiffany幫口, 我先可以揀番2件我like嘅禮服咋! 依家都唔知邊個結婚......

試完之後, 我同灰生9秒9帶番媽咪去搭車, 跟住我哋自己飛去萬豪食我嘅Birthday Buffet. 雖然生日冇discount, 不過有"Birthday cake"

好開心呀! 多謝灰生~

意外行程

今日放工諗住同灰生去尖沙咀百利睇過大禮用品, 搭巴士無論搭幾號我一向都有心水座位, 就係上層車尾左面窗口位。

一埋到去正想坐低之際, 見到有個黑色銀包喺櫈上面, 但又冇其他人坐附近, 咁應該係上一程車嘅乘客漏低啦, 銀包入面有一大疊"紅衫魚", 有身份證, 長者咭同埋八達通, 咩都喺晒銀包, 物主真係邊度都唔駛去lu! 但係搵極都冇聯絡電話, 點算好呢?

本來想交俾司機, 但係諗諗吓都係唔好, 費事有人貪心將阿伯d錢攞晒, 掉埋人哋個銀包點算呀, 咁我咪做咗幫兇lor~ 所以最後寧願行遠d交去差館, 物主搵得番嘅機會都大d吖。經警察叔叔點算, 個銀包入面有HK$1720.00, 仲要冇提款咭 / 信用咭, 物主應該係窮人, 大拿拿有咁多錢喺銀包, 應該係剛剛攞完錢準備交租之類, 希望黃伯伯會報警啦, 物主叫: 黃謂, 我係搭5號巴士執到個銀包架, 如果有人識lee位黃伯伯, 請話俾佢知佢個銀包喺尖沙咀警署啦~

完成任務開心晒, 再去番百利睇野, 不過我哋想睇間舖今日休息wor, 咁算啦, 可能整定要我特登出嚟幫阿伯執番個銀包呢~

為答謝灰生陪我走嚟走去運吉, 就請佢去翠華食餐好嘅慰勞吓佢啦~

2008年9月28日星期日

不能delete的網誌分類

好激氣呀, 點解明明已經轉晒d網誌去新分類度, 系統亦都已顯示只有0個網誌, 都但係delete唔到個舊網誌分類架?????

Facial + Body Treatment

十二月就要影結婚相喇, 識我嘅朋友都知我一向都虎背熊腰, 所以join咗course做通淋巴, 同埋買咗D草本瘦身product嚟食(大家請放心, 我食咗10日都仲未有事, 仲輕咗少少同埋冇咁腫tim, 因為係草本成份, 所以冇副作用架~), 希望可以喺影相前瘦番D, 如果影結婚相要靠塊紗遮遮掩掩, 咁就嘥咗輯相啦~