百無......

今日放工番屋企, 用番琴晚買嘅帶子同意粉整Dinner, 入到廚房開著火, 想落香草冇香草, 想落橄欖油冇橄欖油, 淨係得普通油同埋蒜頭, 一於整炒意粉啦~ 估唔到又OK好食喎, 食完之後點番數睇下邊D調味品用晒, 下次去supermarket一次過買番晒佢先得!

SKINFOOD -- 青瓜系列

                                
                               

平日用開嘅波爾多紅酒同南瓜系列cream喺夏天唔0岩用, 今日終於去SKINFOOD買咗青瓜系列嘅乳液同埋精華素, 用完之後真係好補濕同埋好爽, 好正!!! 咁個波爾多紅酒同南瓜系列一於留番秋冬至用啦~

忙碌的MONDAY

今日係星期一, 例牌超忙, 個個同事都忙都摩打手, 係咁打電腦reply e-mail, 報價, 跟單, 跟辦, 追貨...... 好忙... 好忙...好忙!!!  大陸班小妹妹同事仲唔識死, 係咁打message俾我哋, 都已經話咗老板番咗香港, 今朝我哋已經收埋咗個msn架啦, 佢哋仲係咁不停send messag過嚟傾計, 答完又問, 玩咗好耐都唔肯停, 唔應佢個message box又係咁閃, 仲揚!  最後老板睇到小妹妹send俾我個message, 叫我俾佢reply, 我心諗, 死啦, 佢實冇命啦~ 點知老板係咁同佢玩野, 最後小妹妹終於知道唔係我同佢傾緊計, 問佢係邊個, 老板reply: "我是你老總! 你還不快給我滾回去工作, 還阻礙同事做事的話, 我馬上就叫總管把你的電腦給搬走!!!"  嚇到佢即刻offline, 笑死我

跟住老板叫我遲少少推架手推車落樓幫佢喺車度攞d catalog返上樓, 落到去原來有兩箱catalog, 仲有老板娘同裝修佬, 裝修佬幫手搬d catalog上手推車後就望住我, 我又望住佢, 因為我推唔郁嗰兩箱野, 超重呀!!! 跟住佢就幫我推, 而我就幫老板娘攞木耳、燕窩同埋魚翅, 係呀, 冇錯, 我老板娘又去掃貨喇~ 豪咗幾分鐘, 唔~ 感覺真好!!

今日做野咁辛苦, 放工約咗兔爸去市中心食飯, 兔爸請客, 萬歲~ 去咗百瀧食海鮮墨魚汁意粉同埋牛肉燒, 好味道!!!  之後去咗行街, 睇下有冇我鐘意嗰對白色人字拖, 點知都係字有, 我諗都係要出去專門店買LU, 然後去咗行西田SUPERMARKET, 因就嚟CLOSE, 所以只買咗帶子, 意粉仲有UCC COFFEE, 再唔買COFFEE我就冇心機OT架喇~ 行完就番屋企LU~

外傳: 今日超黑仔, 琴晚特登renew咗iPod Shuffle入面D歌仔, 諗住搭車番工時聽住訓陣覺, 點知...... 出門口至發現開極都開唔到機, 唔制呀~  番到屋企即刻搵去

http://apple.com搵software reinstall, 整完之後就聽得番喇, YEAH!

孖生兄弟?!

                            

今日同兔爸帶咗Bubble仔去兔協剪甲甲, 上到去已經有成村人同兔兔喺度排緊隊剪毛同剪甲, 咁我同Bubble仔就企咗喺梳化旁邊等下先啦~ 等等下冇野做, 八下其他兔兔喺度做緊咩先? 點知俾我見到 --- 咦?! 乜Bubble仔有個孖生大哥嘅咩? 唔通我睇錯? 行埋去睇清楚d先得, 嘩! 真係有八成似喎!!  

原來嗰隻兔兔叫康康, 以前係棄兔嚟0架, 不過依家俾兔媽領養咗之後就好食好住, 毛光肉滑啦~ 康康同Bubble仔一樣係獅子兔x侏儒兔, d毛色都勁似, 淨係睇個pat pat真係分唔到邊隻打邊隻0架

Bubble: 上面張相係康康媽咪幫我影架, 靚唔靚呢?  Thank You晒~

有獎問答遊戲 -- 孖生兄弟?!

                          
                          

 

各位兔友, 今期有奬問答遊戲嘅題目係: 上面有兩幅圖, 究竟邊隻係康仔, 邊隻係Bubble仔呢? 

 

 

 

熱到跳舞~

Bubble: 今日咁熱, 有冰墊都熱到跳舞呀~ 講到跳舞, 又點少得我lee身今年最興嘅Hip-Hop裝備呀! 有CAP帽啦, 耳環啦, 鼻環啦, 絕對唔少得嘅就係好似我咁, 喺pat pat度整番個紋身嘞! 見到我咁潮, 係咪好想同我一齊跳舞呢?

YO! COME ON, GIRLS~  LET'S DANCE!

Disable程度降級

琴日請咗半日假去上水睇跌打, 就係上次睇一次就幫我醫番好背脊撞傷嗰個醫師, 我依家做咗佢忠實粉絲, 有咩事就算遠一遠都走去俾佢醫, 今次扭傷腳當然唔例外啦~  

因為之前已經打咗電話去輪籌, 所以唔駛等好耐就到我喇, 一入到去佢見到我隻腳, 就叫我坐低, 馬上幫我放瘀血, 過程係先用個有針嘅迷你錘仔喺我積咗瘀血嘅地方拮咗好多下, 等d瘀血有位流出嚟, 然後用真空拔罐吸d瘀血出嚟, 足足有成1/3個玻璃杯咁多呀~  好恐怖? 都唔係架, 佢做得乾淨俐落, 唔覺得太恐佈喎~ 然後俾咗支1.25L嘅藥我番屋企飲, 大功告成, 走得lu~

睇完之後我隻殘腿由原先行樓梯超痛變成少少痛, 行平路由跛下跛下變成唔跛, 我諗過多幾日應該會冇事, 肥仔醫師你係得嘅!

P.S. 睇咗咁多次知道咗去睇LEE個醫師有以下秘訣: 唔駛問咁多, 唔駛驚, 唔好望, 整得你痛咩? 大叫LOR~

 

榮康藥業公司 -- 馮顯洋中醫師

地址: 上水新豐路65號B地下

電話: 2679 0050 / 9872 7648

** 逢星期三休息**

 

接二連三的血光之災?!

話說本星期一小女子因感冒引致身體不適 (最衰都係公司部冷氣! 幾年冇洗過, 攞塊隔塵網就揚晒d菌出嚟 ), 本來諗住攞番份文件番公司就跟手請假去睇醫生, 點知番到觀塘過完天橋行到最後兩級樓梯時, 突然暈一暈成個人失晒平衡, 喺兩級樓梯嘅高度跌落地拗柴再扭親, (即係連中兩元), 一路跌仲聽到幾聲啪啪聲, 唔知有冇跌斷骨, 痛到死又冇同事行過, 好彩有兩個趕番工嘅路人冒住遲到嘅危險好心幫我call咗白車, 雖然唔知你會唔會睇到, 但都在此講多句真的非常感激兩位!!!

唔係講笑, 冇佢哋我真係唔知點算呀! 點解? 喺我等白車嘅時候d人行過唔會理你係咪有事, 淨係覺得你阻住佢, 有d男人仲停喺度係咁望, 但又唔似係想幫你喎, 只係睇熱鬧心態, 真係勁賤格+變態!!!!!!!!!!

白車到咗之後救護員哥哥(雖然應該有三十幾歲, 但係都ok靚仔架!)幫我包好隻痛腳之後夾手夾腳扶我上架車仔度坐低, 蓋咗張毛巾再扣埋安全帶, 當時我成個outlook好聽就係俾人安置喺一個安全嘅運輸工具上面送上白車, 唔好聽就係好似精神病人咁俾人扣住等送番青山 雖然條街好短, 不過都好多人望, 勁樣衰呀~~~

去到醫院救護員哥哥幫我登記咗之後又趕住去救第二個喇, 我等咗兩個鐘見醫生, 再等一個鐘照X光, 再等一個鐘見多次醫生攞假紙同藥單, 其間睇到醫護人員極度不足lor, 醫生叫我個名叫咗五,六次, 我方圓廿哩都見唔到一個嬸嬸可以幫我推張輪椅入去, 醫生叫咁鬼多次冇人應又唔行出嚟望下喎, 搞到我最後放棄張輪椅, 自己單腳跳入去見醫生lor, 入到去醫生仲好意思問我做咩跳入去, 我咪話出面一個嬸嬸都冇, 我右腳又好痛, 咁咪用左腳跳入嚟lor!!! 佢竟然話: 咁即係冇咩事啦~ 頂!!! 冇事駛乜嚟搵你睇我呀, 你傻架!!! 我冇理佢啦, 攞住張藥單去地下箭咀指嘅方攞藥, 點知...... 原來係樓梯 唔係掛?! 又要表演單腳跳, 不過今次係跳上樓梯, 真係xyzabc*#$%^&*.......

等咗幾個字攞完藥就去咗等的士番屋企啦, 見d人排到兩邊咁, 我咪伸咗半個身出隊外面(腳冇郁, 因都郁唔到)睇下我排緊嗰面0岩唔0岩lor, 點知有個八婆(佢係醫院職員!!!) 撞開我仲攝咗我個位, 之後話我後過佢喎, 你死架?! 唔怪得醫管局成日俾人投訴啦, 唔該醫管局請人, 試用期期間睇埋d人品格啦, 影衰晒呀!!!

過咗成個星期, 終於可以行得正常d喇, 希望快d好番晒啦~

**以上我所講嘅係聯合醫院, 的士站事件嘅員工係著便服, 但有掛醫院staff card!**