好耐冇寫過BLOG喇, 臨訓前突然好想D嘢, 所以就上來了~
琴日結婚一週年, 由於同Daddy新曆生日同一日, 所以先同Daddy食飯, 今日先同老公補番慶祝, 其實都冇所謂啦~
今日去咗長洲, 10年冇入過去, 真係唔同晒lu~ 人山人海到好似旺角咁, 我哋周圍行, 行到邊食到邊, 食咗好多嘢呢~ 
但係一路行個心就一路諗住公司排山倒海未做完嘅工作, 之前就算做唔晒, 開足2星期turbo一定清到, 今次竟然完全搞唔掂! 要揾同事幫手之餘仲係清枱無期...... 係咪我工作能力出咗問題? 定係公司生意真係咁好呢? 喺LEE 2 年半入面, 工作上自問對得住人, 對得住自己, 完全係付出晒所有精力去完成工作, 以為LEE間公司係值得我去為佢捱, 但係LEE排終於夢醒喇, 不停OT不單吃力不討好, 仲要搞到自己身體一團糟! 先嚟做到冇晒精神行級樓梯都差錯腳, 扭傷晒2隻腳, 再嚟執千年貨搞到勁污糟嘅麈入眼, 仲發炎要睇醫生, 身體同精神一直處於極度緊張狀態, 連生理時鐘都亂晒龍!
發生咁多事我終於諗通根本唔係我自己問題, 係我太蠢太搏命太唔識照顧自己, 對公司好公司唔會多謝你, 只會覺得你做到再俾多D你做, 你唔出聲就難做/麻煩嘅全部俾晒你做, 我都唔明點解可以要一個人做咁多嘢! 人哋唔夠人做嘢即刻俾多個人佢哋, 搞到我哋得番兩個, 做到死都冇人知! 仲要夾硬配合A/C嘅白痴要求, 最離譜就係要做埋倉務員嘅工作: 一大堆貨喺倉, 每次話要幾多就要執幾多俾佢!!! 如果我唔忙我唔介意, 但係忙到死嘅時候都要做埋D咁不知所謂嘅嘢就好過份啦!!!!! 我只有一對手, 我已經盡晒我嘅努力, 如果嚟緊嘅日子KEEP住要我好似依家咁做法, 我唯有離開! 我只會為值得嘅公司去盡心盡力, 但係我哋全體同事盡心盡力嘅同時, 公司俾我哋嘅回報就係唔加人工同埋人手流失唔請番人! 我係好肯做嘅一個人, 但係我唔會再咁蠢放棄晒我自己嘅健康/家庭/休息時間同你去癲! 由聽日開始, 我做到攰就會收工, 放假儘量唔會番, 做唔晒都唔會當係自己錯, 因我已盡我全力去做! 但我亦可以保證只要我一日仲喺LEE間公司, 我就會有始有終, 工作態度唔會改變, 仍舊會盡力去做, 直到我真正離開嗰日為止!
