不能delete的網誌分類

好激氣呀, 點解明明已經轉晒d網誌去新分類度, 系統亦都已顯示只有0個網誌, 都但係delete唔到個舊網誌分類架?????

Facial + Body Treatment

十二月就要影結婚相喇, 識我嘅朋友都知我一向都虎背熊腰, 所以join咗course做通淋巴, 同埋買咗D草本瘦身product嚟食(大家請放心, 我食咗10日都仲未有事, 仲輕咗少少同埋冇咁腫tim, 因為係草本成份, 所以冇副作用架~), 希望可以喺影相前瘦番D, 如果影結婚相要靠塊紗遮遮掩掩, 咁就嘥咗輯相啦~

另外, 仲join埋facial course, 一向唔貪靚嘅我都要為BIG DAY開始努力lu~

 

Birthday特備節目

今日食LUNCH時青樺 Tiffany 來電, 原來想同我約時間挑選影結婚相嘅禮服, 仲話原來12月影相嘅準新人之中得我哋lee pair未book時間咋, 大家真係心急喇~

Tiffany提意10月18號, 但係小妹11號生日, 橫掂冇咩特別搞作, 所以決定喺10月11號挑選影結婚相嘅禮服, 就當係我送俾自己嘅Birthday特備節目啦~

好大風嘅8號風球

琴日4點鐘知道6點會掛8號風球, 但係我唔係住離島, 唔走得住, 等到6點半做完手頭上嘅工作, 即刻同A/C同事一齊走。

落到街唔算大雨, 不過勁大風, 要好用力撐住把遮先冇吹走。 行去巴士站途中, 到馬路中間時, 俾D風吹到打橫行, 差D撞埋架貨櫃車度, 好彩有驚無險, 最後安全過完馬路, 但係把遮嘅遮骨吹到摺埋咗, 就咁玩完。

當我回頭想睇吓我同事有冇事時, 發現原來佢根本仲未過馬路, 仲企咗喺原位, 因為佢弱質纖纖, 俾D風吹番轉頭, 但因為太大風, 我冇辦法喺行人路上面停太耐, 所以冇等到佢就自己去搭車先。 今朝番工仲見到佢, 好彩佢冇俾風吹走咗唧。

自己把遮摺埋咗唯有落去7-eleven買多把長遮啦, 點知出咗地鐵站, 等緊巴士時, 連新遮都報銷埋, HK$39.90用唔夠3分鐘。

等咗好耐先有巴士, 司機叔叔亦好體貼我哋D乘客, 知道個個淋到濕晒所以將平日個殮房冷氣開細咗, 唔該晒司機叔叔!

入到門口睇吓鐘, 竟然用多咗1個鐘先番到屋企! 真係夠晒耐lu~

今朝起身開電視, 一見到得番3號風球, 唯有好失望咁換衫番工啦~