辛苦完整個星期, 諗住同Bubble爸食餐好d, Bubble爸提議去沙田市中心連城廣場嘅Strawberry Forever試下, 因為上次我皇媽指定要去隔離間表哥食, Bubble爸見到人哋個menu有大大碗熱辣石頭鍋飯流晒口水, 今次我哋兩口子撐枱腳就去試下啦!
開頭大家都開開心心點餐冇咩問題, 個忌廉湯唔夠熱, 冇咩味, 算啦, 好多餐廳都係咁, 到Bubble爸個飯上枱先嚇親! 同個menu張相簡直係兩回事, 等番1/4份量(both個煲同飯餸)!!! 所謂嘅石頭鍋飯就係用個凍嘅淺底黑色細煲仔喺電飯煲攞d飯放入去, 再放幾塊現成kimchi, 幾塊爛鬼豬軟骨最後淋D kimchi水+所謂肉汁上面做汁, 一食落口Bubble爸爭d噴飯, 我見佢咁誇我都即試咗啖, 嚇死咗, 唔再掂佢碗野, 乖乖等我個意粉好過~ 
到我個青芥末煎鴨胸意粉上場喇, 一入口就食得出青芥末汁溝咗好多水, 全碟得3塊"刀工精美" -- 好薄而唔覺有被煎感覺嘅鴨胸, 再加上茶餐廳都不如嘅發水cheap意粉! 頂頂頂!!! 我自己整好食過佢10000倍, 俾咗錢免為其難食晒d冇味鴨胸同蔬菜, d人埋嚟收走碟冇收我碟意粉, 我叫佢收埋佢, 佢竟反問我: 小姐, 你都未食完? 我答: 收啦! 好難食呀!!! 佢若無其事咁收走碟意粉, 我叫佢上埋餐茶同cake啦(每個套餐加$20有"半件cake", 點解我咁強調係"半件cake"? 因為對佢本身而言算係一件, 但你同是但一間同樣收$20一件嘅coffee shop比完全係少咗一半lor! 勁呃錢!!! 
個餐茶先搞笑, Bubble爸叫咗杯凍檸檬茶, 我叫熱檸檬茶, Bubble爸一飲入口又叫我試, 哈哈! 勁呀! 好一杯有冰但又唔凍, 有檸檬但冇檸檬味, 有茶色但又冇茶味嘅凍檸檬茶! 等咗10mins都未見我杯熱檸檬茶, 催佢先施施然沖俾我, 仲要係唔熱, 同樣係有檸檬但冇檸檬味, 有茶色但又冇茶味嘅熱檸檬茶! 但最神奇都可算係唔知點解會有唔應該出現嘅咖啡味lor! 我同佢投訴杯檸檬茶咖啡味仲重過檸檬味, 佢夠膽死只好行咁講咗句: 係呀, 唔好意思wor~ 頂! 嬲到我叫Bubble爸一毫子tips都唔好俾!
同場加映隔離枱斯文OL小姐同男友食飯, 叫咩冇咩, 叫士多啤梨紅豆甜品就有士多啤梨冇紅豆, 叫芒果甜品又唔知冇咩, 總之連問幾樣都係冇嘅! 另一枱就換咗幾杯奶茶都係咖啡味, 勁離譜!!! 
大家請記住LEE間鋪, 冇野食都唔好去幫襯呀!
乜今時今日的服務可以咁架, 真不知所謂!! 我有次同兔媽晚上去表哥食, 入去時已經無人帶位, 唔緊要, 自己搵位, 因為無乜人 (奇怪是晚上7點幾都無人食!!) 坐左係度成5分鐘, 無人理, 只係見有2個女侍應, 自己坐係位度食野, 1個女的行左唔知係邊. 後來有人放低茶和餐具行開左. 我地再睇 menu, 想叫野食, 只見2個女侍應繼續食, 唔理我地. 結果嬲嬲地走左 !!! 去左隔離果間食越南野....
回覆刪除你講到間 strawberry 咁差, 我都要諗下去唔去先, 不過覺得連城真係唔好 feel. 下次都係去西田同6樓度食, 貴就貴d
[版主回覆01/24/2008 22:42:00]唔駛諗啦, 千祈唔好去呀! 其實6樓d價錢都ok, 我都打算轉移陣地上6樓食!
Bee 豬 : 小琪姐姐, 天寒地凍, 食個一肚火 dinner 都幾好噃
回覆刪除[版主回覆01/24/2008 22:43:00]Bee豬, 其實藤條火煱仲好味道呀!
(Empty)
回覆刪除[版主回覆01/24/2008 22:44:00]多謝你呀, Joy~ 係咪你自己整嘅先?
你講果間係咪有好多分店果間Strawberry? 如果係... 我都係旺角同太子分店有過好不愉快既經歷... 因為好唔滿意，我地咪搵人投訴，點知個店長仲黑口黑面咁講 "我係呢度最大o既... 有咩唔滿意... " 簡直係不知所謂！
回覆刪除[版主回覆01/24/2008 22:46:00]佢咁串? 你咪答佢"我最唔滿意就係你嘅服務態度!!!", 睇下佢點答你? 總之lee間野無論邊區都好, 都已經轉手轉到變晒質, 都係唔好去食, 留番d錢買靚草草俾寶貝兔食好過啦~
呢間嘢很久前己經俾我blacklist咗...
回覆刪除[版主回覆01/24/2008 22:47:00]唉~ 真係激死人!
回覆刪除由食物到態度，都如此劣，繼續惠顧，以維持這等地方生存的人，不單味蕾壞了，還是聾的、瞎的 。。！
[版主回覆01/24/2008 22:49:00]係啦, 再幫襯就真係老襯喇, 連食乜都話唔錯嘅兔爸都話佢難食, 佢就真係要快d摺埋啦~
嘩, 痴線架你? 上次咪同你講過我男朋友o係旺角家樂果間strawberry forever食左一碗壞o既西米露食到肚痛, 叫你千祈咪去食架啦! 係全線分店呀! 間間都有問題~!! 傳開去等佢執笠吧啦!!!
回覆刪除[版主回覆02/05/2008 18:16:00]係咩?! 你識我咁耐你都知啦, 本小姐有間歇性青年痴呆, 如果唔係都唔會中招啦~